CCCLXVI.

1482, April 12. Schloss Glatz.

Herzog Heinrich I, von Münsterberg, Graf zu Glatz, bestätigt dem Stifte die Befreiung hinsichtlich des Einlegens von Pferden in dasselbe.

Wir Hainrich der elder, von gotes gnoden herczog czw Munsterberg und grove czw Glotcz, bekennen und thuen kunth offintlich mit diesem brife vor allen den, dy ehen sehen ader horen lesen, das vor uns ist erschynn der wirdige her Jacobus apt czw Camencz, yn sein und seynr samnunge namen, unser andechtigen, besundern liben getrawen, uns bemelt, das yn kortcz vorgangen czeyten durch unser amachtlewthe etliche pherde, czw czeyten czwey, czw czeyten drey off etczliche tage ader wochen weren yn yr closter geleget, dy zy denne auss keynem vorphlicht, sunder auss gutwillickeyt uns czw sunderlichem gefallen mit futter vorsorget hetten; nw besorgen zy sich, das dys mochte alzo voraldern und denne forth, alss vor recht von ehen gefordert werden wider ire privilegia und freiheyt, auch irem closter czw grosser beschwerung, und haben uns genugsam irzeiget ire privilegia und freiheyt, und yn sunderheyt eyn privilegium unser vorfaren, der irlauchten furstenn herczog Bernharth und Bolko gebruder, seliges gedechtnesz, ethwan furstenn czw Munsterberg, welchs clerlich yn sich helt sulcher und ander beschwerung, entladung, und haben uns demuticlichen umbe gotes willen gebeten, sy genediclichen vorsorgen und bey sulch privilegium behalden. Nw habe wir auss furstlicher guttickeit sulchem privilegio noch betracht unser und unser nochkomenden zelen selickeyt, auch sulche gutwillickeyt, und getrewliche beystendickeyt des hernn aptes und seyner sampnung, und wollen sy bey diesem und allen andern privilegien behalden und nw noch nymmer den hern apt und seyne nochkomlinge des bemelten closters wider ire privilegian und ober iren gutten willen mit sulchem eynleger und ander beschwerunge bedrangen, alzo weith wir vorhoffen von gote uns und unsern nochkomenden zelickeyt, geluck und heyl. Des czw urkunth habe wir diesen briff mit unserm anhangende eyngezegel bezegelt lossenn werden. Gescheen of unserm schlosse Glotcz am freitag vor synth Tiburtii feyer, noch Christi unsers hern geburth virczenhundert und des achtczigesten und ander iores. Do bey gewest seyn neben dem hern apt dy wolbenampten, unser liben getrawen: Heyntcz Domantcz von Schrebsdorf, Hannus Pogrel von Habersdorff, Jorge Kaldenborn czw Lamprichsdorff gesessen und vil ander glawbenwirdigen.

Or. Perg. An einem Pergamentstreifen hängt das wohlerhaltene herzogliche Siegel, (quadrierter Schild mit dem Wappen des F. Münsterberg und des Geschlechtes Podiebrad).

Codex Diplomaticus Silesiae, hrsg vom Vereine für Geschichte und Alterthum Schlesiens, Bd 10, Urkunden des Kloster Kamenz. Hrsg von Dr Paul Pfotenhauer, Breslau 1881.